ދުނިޔޭގެ އެހެން ގައުމުތަކުންވެސް ކާގޯ ބޯޓު ފަހަރަށް ފޯރު ކޮށްދޭ ޚިދުމަތްތަކުގެ ތެރޭ ހިމެނޭ އެންމެ މުހިންމު 14 ޚިދުމަތް، ފޯރު ކޮށް ދިނުމަށްޓަކައި މޯލްޑިވްސް ޕޯޓްސް ލިމިޓެޑުން ތައްޔާރުވަމުންދާކަމަށް އެކުންފުނީގެ ސީއީއޯ މުޙައްމަދު ވަޖީހު އިބްރާހީމް ވިދާޅުވެއްޖެއެވެ.
އުތުރުގައި ފޯރުކޮށްދިނުމަށް ހަމަޖެހިފައިވާ މެރިޓައިމްގެ ޚިދުމަތްތަކާ ގުޅޭ ޚާއްސަ ވެބްސައިޓް އުތުރު މެރިޓައިމް ސާވިސަސް ލޯންޗުކޮށްފައިވާއިރު މީގެ އިތުރު މައުލޫމާތު ދެމުން ވަޖީހު ވިދާޅުވީ ގުޅި ލާމެހިފައިވާ ދުނިޔެ އެއްގައި، ރާއްޖެ އުފެދިފައި މިވަނީ، މެރިޓައިމް ދާއިރާއިން ބޮޑެތި ނަފާ ތަކެއް ގައުމަށް ހޯދާ ދެވިދާނެ ފަދަ މުހިންމު ލޮކޭޝަނެއްގައި ކަން އެންމެންވެސް ގަބޫކުރާކަމަށެވެ. އެހެނަސް މިބޮޑު މަންފާ މިހާތަނަށް އެއްވެސް ސަރުކާރަކަށް ގައުމަށް ހޯދާ ދެވިފައި ނެތްކަމަށް ވަޖީހު ވިދާޅުވިއެވެ.
ވަޖީހު އިތުރަށް ވިދާޅުވީ އަނަރޫފަ ވެފައިވާ ރާއްޖޭގެ އިގުތިސާދު، ދިރުވައި ކޮޅަށް ޖެއްސެވުމަށްޓަކައި، ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ވެރިކަން ފެށްޓެވުމާއެކު އެމަނިކުފާނު ފެށްޓެވި މަސައްކަތް ޕުޅު ތަކުގެ ތެރޭގައި ހިމެނޭ މުހިންމު އެއްކަމަކީ ރާއްޖޭގެ މެރިޓައިމް ދާއިރާއިން ދެވޭ ޚިދުމަތްތައް ފުޅާ ކުރައްވައި އިގުތިސާދީ ގޮތުން ގައުމަށް ބޮޑު މަންފާތަކެއް މިދާއިރާއިން ހޯއްދަވާ ދެއްވުމުގެ މަސައްކަތް ޕުޅުތައްކަމަށެވެ.
އެގޮތުން އެމްޕީއެލް އިން ލޯންޗް ކޮށްފައިވާ އުތުރު މެރިޓައިމް ސާވިސަސް ވެބުސައިޓަކީ، ރާއްޖޭގެ އުތުރުގައި ހިންގުމަށް ތައްޔާރު ވަމުންދާ މެރިޓައިމް ޚިދުމަތްތަކާއި ބެހޭ މައުލޫމާތު ސާފު ކޮށްދޭ ވެބު ސައިޓެއްކަމަށް ވިދާޅުވެ އެމްޑީ ވިދާޅުވީ މި ޚިދުމަތް ތައް ފުޅާ ވަމުންދާ ވަރަކަށް، އެމައުލޫމާތު ތައް ވެބުސައިޓު ގައި އަދާހަމަކުރެވެމުން ގެންދެވޭނެކަމަށެވެ.
އިހަވަން ދިއްޕޮޅުގެ ރަށްތަކާއި ވަރަށް ކައިރިން، ކޮންމެ 24 ގަޑި އިރެެއްގެ ތެރޭ ދުނިޔޭގެ އެކި ގައުމު ތަކުގެ 250 ވަރަކަށް ބޮޑެތި ކާގޯ ބޯޓު ދަތުރު ކުރަމުންދާ އިރު އަމާޒަކީ، މިބޯޓު ތަކަށް ބޭނުންވާ އެކި އެކި ޚިދުމަތްތައް ފޯރު ކޮށްދޭނެ އިންތިޒާމް ތައް ހަމަ ޖައްސައި ދިނުންކަމަށް ވަޖީހު ވިދާޅުވިއެވެ.
އެގޮތުން 14 ހިދުމަތެއް ފޯރުކޮށްދޭއިރު ތެލުގެ ޚިދުމަތް ފިޔަވައި އެހެން ހުރިހާ ޚިދުމަތްތަކެއް ފޯރުކޮށްދޭނީ އެމްޕީއެލް އިންކަމަށާއި ތެލުގެ ޚިދުމަތް ފޯރު ކޮށްދޭނީ އެސްޓީއޯ އިންކަމަށް ވަޖީހު ވިދާޅުވިއެވެ.
އަމާޒަކީ، މިއީ އިންޓަރނޭޝަލަލް މާކެޓަށް ދެވޭ ޚިދުމަތް ތަކަކަށް ވާއިރު، ކޮމްޕެޓިޓިވު މާކެޓެއްގެ ތެރެއިން، އެޓުރެކްޓިވް ޚިދުމަތް ތަކެއް ފޯރު ކޮށްދީ، ރަގަޅު މާކެޓް ޝެއާރ އެއް ރާއްޖެ އަށް ހޯދުންކަމަށާއި މި ޚިދުމަތްތަކާއި ބެހޭ މައުލޫމާތު މިހާރު ވެބުސައިޓު މެދުވެރިކޮށް ރައްޔިތުންނަށް ލިބެމުންދާނެކަމަށް ވަޖީހު ވިދާޅުވިއެވެ.
މެރިޓައިމް ދާއިރާ އިން، މިފެށޭ ޚިދުމަތް ތަކުން، ކައިރި މުސްތަގުބަލެއްގެ ތެރޭގައި ގައުމަށް، ގައުމުގެ އިގުތިސާދަށް ހެޔޮ މަންފާތަކެއް ކުރަން ފަށާނެކަމުގެ ޔަގީންކަން ދެއްވައި ވަޖީހު ވިދާޅުވީ މިއީ 24 ގަޑި އިރުގެ އޮޕަރޭޝަނަކަށް ވާއިރު، މި ޚިދުމަތް ދޭނެ މުވައްޒަފުން މިކަމަށް އަހުލުވެރިކުރުވައި، މިކަމަށް ބޭނުންވާ ވަސީލަތްތައް ގާއިމް ކުރުމުގެ މަސައްކަތް ކުރަމުންދާކަމަށެވެ.
