ހޮނިހިރު ދުވަހުގެ ހިޔާގެ ޓަވަރުތަކުން ކަރަންޓު ކެނޑިދާނެ - ސްޓެލްކޯ

ޑި ހުޅުމާލޭގެ ދެވަނަ ފިޔަވަހީގެ ދާއިމީ ކަރަންޓު ޑިސްޓްރިބިއުޝަން ނެޓްވޯކްގެ މަސައްކަތް ކުރުމަށް ހިޔާ ފްލެޓްއިން އަންނަ ހޮނިހިރު ދުވަހުގެ ބައެއް ގަޑިތަކުގައި ކަރަންޓް ކެނޑިދާނެ ކަމަށް ސްޓެލްކޯއިން ބުނެފިއެވެ.

ދެވަނަ ފިޔަވަހީގައި އަލަށް ހަދަމުން އަންނަ އިމާރާތްތަކަށް ކަރަންޓު ފޯރުކޮށްދިނުމަށްޓަކައި އެ ކުންފުނިން ގާއިމްކޮށްފައިވާ ވަގުތީ ޑިސްޓްރިބިއުޝަން ނެޓްވޯކް އަޕްގްރޭޑް ކުރުމުގެ މަސައްކަތް ކުރުމަށް އަންނަ ހޮނިހިރު ދުވަހު ހިޔާ ޓަވަރު 1 އިން 8 އަށް، ހެނދުނު 10:00 އިން މެންދުރު 12:00 އަށް ކަރަންޓު ކެނޑިދާނެ ކަމަށާއި ޓަވަރު 9 އިން 16 އަށް މެންދުރުފަހު 2:00 އިން 3:30 އަށް ކަރަންޓް ކެނޑިދާނެ ކަމަށް ސްޓެލްކޯއިން މިއަދު ވަނީ ބުނެފައެވެ.

ކަރަންޓް ކެނޑުމުގެ ސަބަބުން އެވަގުތުތަކުގައި ކަސްޓަމަރުންނަށް ދިމާވެދާނެ ދަތިތަކަށް ކަސްޓަމަރުންގެ ކިބައިން ސްޓެލްކޯއިން ވަނީ މައާފަށް އެދިފައެވެ.