ކަރަންޓު މަސައްކަތް ކުރާ މީހުންގެ އާ ދަފްތަރެއް އެކުލަވާލަނީ

ރާއްޖޭގައި ކަރަންޓުގެ މަސައްކަތް ކުރާ މީހުންގެ އާ ދަފްތަރެއް އެކުލަވާލަން ޔުޓިލިޓީ ރެގިއުލޭޓަރީ އޮތޯރިޓީން ނިންމައިފި އެވެ.

އެ އޮތޯރިޓީން ކުރި އިއުލާނެއްގައި ބުނީ ކަރަންޓުގެ މަސައްކަތްކުރާ މީހުންގެ ދަފްތަރު އަޕްޑޭޓް ކުރުމުގެ އެންމެ ބޮޑު އެއް ބޭނުމަކީ އޮތޯރިޓީ އުފެއްދުމުގެ ކުރިން އެހެނިހެން މުއައްސަސާތަކުން ލައިސަންސް ހޯދާފައިވާ ފަރާތްތަކުގެ ތެރެއިން ކަރަންޓު މަސައްކަތް ކުރުމުގެ ދާއިރާގައި މިހާރުވެސް މަސައްކަތް ކުރަމުންދާ ފަރާތްތައް ދެނެގަނެ އެފަރާތްތަކާއި މުއާމަލާތް ކުރެވޭނެ މައުލޫމާތު އައު ކުރުން ކަމަށެވެ.

އެގޮތުން މި އަހަރު މާޗް 15 ގެ ކުރިން ކަރަންޓު މަސައްކަތް ކުރުމުގެ ހުއްދަ ހޯދާފައިވާ ފަރާތްތަކުން އެ އޮތޯރިޓީގެ ވެބްސައިޓްގައިވާ ފޯމު ފުރިހަމަކޮށް، secretariat@ura.gov.mv އީމެއިލް އަށް އަންނަ އަހަރުގެ އޭޕްރިލްގެ ކުރިން ހުށަހެޅުމަށް ޔުޓިލިޓީ އޮތޯރިޓީން ވަނީ އެދިފަ އެވެ.

މައުލޫމާތު އާ ކުރުމަށް ދީފައިވާ މުއްދަތުގެ ތެރޭގައި ފޯމު ހުށަނާޅާ ފަރާތްތަކަކީ މިހާރު ދާއިރާގައި މަސައްކަތް ކުރަމުން ނުދާ ފަރާތްތައް ކަމަށް ނިންމާ ލައިސަންސްތައް ބާތިލް ކުރެވޭނެ ކަމަށްވެސް އެ އޮތޯރިޓީން ވަނީ ބުނެފަ އެވެ.