އީރާނަށް ހަމަލާ ދިނުމަށް އިސްރާއީލުން އިރާގުގެ ވައިގެ ސަރަހައްދު ބޭނުންކުރި މައްސަލަ، އިރާގުން ރަސްމީކޮށް އދއަށް ހުށަހަޅައިފިއެވެ.
މިކަން ހާމަކުރީ އިރާގު ސަރުކާރުގެ ތަރުޖަމާނެވެ.
އީރާނަށް ވައިގެ ހަމަލާދިން އިސްރާއީލުގެ އަސްކަރީ ޖެޓުތައް، އިސްރާއީލުގެ އަސްކަރީ ބޭސްތަކުން އުދުހިފައި ދިޔައީ އުރުދުންމަތިން އަދި އިރާގުގެ ވައިގެ ސަރަހައްދުންނެވެ. އިރާގުގެ ވައިގެ ސަރަހައްދު އިސްރާއީލުން ބޭނުންކުރީ އެކަމުގެ ހުއްދަ ލިބިގެން ކަމަށް ރިޕޯޓްތައް ބުނެއެވެ.
އިސްރާއީލުގެ ޖެޓުތަކުން އީރާނަށް ވައިގެ ހަމަލާ ދީފައިވަނީ އީރާގު ތެރެއިން، އީރާނުގެ އިމާ 70 ވަރަކަށް މޭލު ދުރުންކަންވެސް ވަނީ ހާމަވެފައެވެ. އިސްރާއީލު ޖެޓުތައް އީރާނުގެ ވައިގެ ސަރަހައްދަށް ވަދެފައެއް ނުވެއެވެ.
އީރާނުގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، އިސްރާއީލު ސިފައިން އީރާނަށް ހަމަލާދިނުމަށް ބޭނުންކުރީ އެމެރިކާ ސިފައިން ކޮންޓްރޯލްކުރާ އިރާގުގެ ވައިގެ ސަރަހައްދު ކަމަށް ޔަގީންކުރެވިފައިވާ ކަމަށެވެ.
މިކަމުގެ ހެކިތައް އާންމުވުމާ ގުޅިގެން އެނގިގެންދިޔައީ، އިސްރާއީލު ސިފައިން އީރާނަށް ހަމަލާދިނުމަށް އިރާގުގެ ވައިގެ ސަރަހައްދު ބޭނުންކުރުމުގެ ހުއްދަދިނީ އިރާގުގައި ގާއިމްކޮށްފައިވާ އެމެރިކާ ސިފައިންގެ އަސްކަރީ ބޭސްތަކުން ކަމެވެ.
މި މައްސަލާގައި އިރާގު ސަރުކާރުން ވަނީ، އިސްރާއީލުގެ އަމަލު ވަރަށް ބޮޑަށް ކުށްވެރި ކޮށްފައެވެ.
އިރާގު ސަރުކާރުން ނެރުނު ބަޔާނެއްގައި ބުނެފައިވަނީ، އަވަށްޓެރި އީރާނަށް އަރައިގަތުމަށް އިރާގުގެ ވައިގެ ސަރަހައްދު ބޭނުންކުރުމުގެ އެއްވެސް ހައްގެއް އިސްރާއީލަށް ލިބިގެން ނުވާ ކަމަށާއި، އިރާގުގެ އެއްގަމާއި ވައިގެ ސަރަހައްދަކީ އެހެން ގައުމުތަކަށް އަރައިގަތުމަށް ބޭނުން ކުރަން ހުންނަ ތަންތަން ނޫން ކަމަށެވެ.
އީރާނަށް ހަމަލާދިނުމަށް އިސްރާއީލު ސިފައިން އިރާގުގެ ވައިގެ ސަރަހައްދު ބޭނުންކުރިކަން ހާމަވުމާއެކު، މިކަމުގައި އެމެރިކާގެ އަތެއްވާ ކަމަށް ބުނެ އެތައް ބަޔަކު އެކަން ކުށްވެރި ކުރަމުން އެބަގެންދެއެވެ.
އިރާގުގެ ވައިގެ ސަރަހައްދު އޮތީ އެމެރިކާ ސިފައިންގެ ހިސާރާއި، ފުރިހަމަ ކޮންޓްރޯލާއި، އަދި ކޮމާންޑުގެ ދަށުގައި ކަމަށްވެސް ބުނަމުން އެބަގެންދެއެވެ.
އަދި އިސްރާއީލުން އީރާނަށް ވައިގެ ހަމަލާދިނުމުގެ ޖަރީމާގައި އެމެރިކާގެ ބައިވެރިވުމަކީ އިންކާރު ކުރެވެންނެތް ހަގީގަތެއް ކަމަށްވެސް ބުނެއެވެ.
ހެކިތައް ހާމަވި މައްސަލާގައި އެމެރިކާއިން އަދި އެއްވެސް އެއްޗެއް ނުބުނެއެވެ. އެކަމަކު، އިސްރާއީލުން އީރާނަށް ހަމަލާދިނުމާއެކު އެމެރިކާގެ ދިފާއީ ވަޒީރު ވިދާޅުވެފައިވަނީ، އެ ހަމަލާއާއި އެމެރިކާގެ އެއްވެސް ބައިވެރިވުމެއް ނެތް ކަމަށެވެ.
އިސްރާއީލުން މިދިޔަ ހޮނިހިރު ދުވަހު އީރާނުގެ އަސްކަރީ ބޭސްތަކަށް ވައިގެ ހަމަލާ ދިނުމަށްފަހު ބުނެފައިވަނީ، މިއީ، އޮކްޓޫބަރު މަހުގެ 1 ވަނަ ދުވަހު އީރާނުން އިސްރާއީލަށް ދިން ބެލިސްޓިކް މިސައިލް ހަމަލާތަކުގެ ބަދަލު ހިފުމުގެގޮތުން ދިން ހަމަލާއެއް ކަމަށެވެ.
އިސްރާއީލުން ދިން ހަމަލާތަކުގައި އީރާނު ސިފައިންގެ 4 މީހަކު މަރުވިއެވެ. ނަމަވެސް، އީރާނުން ބުނެފައިވަނީ ލިބުނު ގެއްލުންތައް ކުޑަ ކަމަށެވެ.
އިސްރާއީލުގެ ޖެޓުތަކުން ފޮނުވާލި ގިނަ މިސައިލްތައް އީރާނުގެ ވައިގެ ދިފާއީ ނިޒާމުތަކުންވަނީ ގޮއްވައި، އިސްރާއީލުގެ ހަމަލާ ނާކާމިޔާބު ކޮށްލާފައެވެ.
