ޔުނައިޓެޑް ނޭޝަންސް ރިލީފް އެންޑް ވޯރކްސް އޭޖެންސީ ފޮރ ޕަލެސްތައިން ރެފިއުޖީސް (އަންރްވާ) މަނާކޮށް، އެ އޭޖެންސީއާއެކު ހަދާފައިވާ އެއްބަސްވުން ބާތިލްކޮށް އިސްރާއީލުން އދއަށް ސިޓީއެއް ފޮނުވައި އެކަން އަންގައިފިއެވެ.
އަންރްވާއަކީ ފަލަސްތީނު ރެފިއުޖީންނަށް އިންސާނީ އެހީއާއި، އިންސާނީ ތަރައްގީގައި އެހީވުމަށް އދއިން އުފައްދާފައިވާ ޚާއްސަ އޭޖެންސީއެކެވެ. މިއީ، ފަލަސްތީނުގެ ބިމުގައި އިސްރާއީލާ ކިޔުނު ދައުލަތެއް އުފެއްދުމާ ގުޅިގެން ގަދަކަމުން ގެދޮރާއި، ބިމުން ބޭރުކޮށްލެވުނު ރެފިއުޖީންނަށް އެހީވުމަށް އދއިން އުފެއްދި އޭޖެންސީއެކެވެ.
އިސްރާއީލުގެ ފޮރިން މިނިސްޓްރީން އދއަށް މިއަދު ފޮނުވި ސިޓީއެއްގައި ބުނެފައިވަނީ، އދގެ އޭޖެންސީއާއި އިސްރާއީލާ ދެމެދު 1967 ވަނަ އަހަރު ހަދާފައިވާ އެއްބަސްވުން ބާތިލް ކޮށްފައިވާ ކަމަށެވެ.
އިސްރާއީލުގެ ޕާލަމެންޓުން މީގެކުރިންވަނީ، އިސްރާއީލުން ކޮންޓްރޯލް ކުރާ ފަލަސްތީނުގެ އެއްވެސް ރަށެއްގައި އަންރްވާގެ އެއްވެސް ހަރަކާތެއް ހިންގުން މަނާކޮށް އެތައް ގާނޫނެއް ފާސްކޮށްފައެވެ.
އިސްރާއީލުގެ ފޮރިން މިނިސްޓްރީން އދއަށް ފޮނުވި ސިޓީއާއެކު، އދއިން އިސްރާއީލަށް ކަނޑައަޅާފައި ހުންނަ މަންދޫބު އެކްސްގައި ކުރި ޕޯސްޓެއްގައި ބުނެފައިވަނީ، އަންރްވާއާއި ހަމާސްއާ ގުޅުން އޮންނަ ކަމަށް އިސްރާއީލުން ތަކުރާރުކޮށް ބުނުމުންވެސް އދއިން އެކަމަށް އެއްވެސް ފިޔަވަޅެއް ނޭޅި ކަމަށެވެ.
މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހު ހަމާސްއިން އިސްރާއީލަށް ދިން ކުއްލި ހަމަލާގައި އދގެ އޭޖެންސީގެ ސްޓާފުން ބައިވެރިވާ ކަމަށް އިސްރާއީލުން ތުހުމަތު ކުރުމުން އދއިން އެކަން ތަހްގީގު ކުރިއެވެ.
ތަހްގީގަށްފަހު ބުނެފައިވަނީ، އިސްރާއީލަށް ހަމަލާ ދިނުމުގައި އުންރްވާގެ އެއްވެސް ސްޓާފެއް ބައިވެރިވިކަން އެނގެން ނެތް ކަމަށެވެ. އެހެންނަމަވެސް، އެކަމުގައި ތުހުތުމަތު ކުރެވޭ 9 ސްޓާފުން ވަޒީފާއިން ވަކިކުރިއެވެ.
އދގެ އޭޖެންސީގެ ސްޓާފުންގެ ގޮތުގައި، ޣައްޒާ، ހުޅަނގު އައްސޭރި، އުރުދުން، ލުބުނާން އަދި ސޫރިޔާގައި 30،000 ސްޓާފުން މަސައްކަތް ކުރެއެވެ. އދގެ އޭޖެންސީގެ މައިގަނޑު މަސައްކަތަކީ، ފަލަސްތީނު ރެފިއުޖީންނަށް ތައުލީމާއި، މަސައްކަތްތެރިކަމާއި، ސިއްހީ ޚިދުމަތާއި، އެނޫންވެސް ތަފާތު އިންސާނީ އެހޯތައް ފޯރުކޮށް ދިނުމެވެ.
އިސްރާއީލުން ކޮންޓްރޯލް ކުރާ ފަލަސްތީނުގެ ރަށްތަކުގައި އަންރްވާގެ ހަރަކާތްތައް ހިންގުން މަނާކުރަން މަސައްކަތް ފެށި ހިސާބުން އދގެ ސަލާމަތީ މަޖިލީހާއި، ދުނިޔޭގެ ހުރިހާ ގައުމެއްހެން ކަހަލަ ގޮތަކަށް އެގޮތަށް އެކަން ކޮށްގެން ނުވާނޭ ކަމަށް އިސްރާއީލަށް އަންގަމުން ގޮސްފައި ވެއެވެ.
އިސްރާއީލުގެ ނިންމުމުގެ ސަބަބުން އެންމެ ބޮޑު ނިކަމެތިކަމެއް ލިބިގެންގޮސްފައިވަނީ ޣައްޒާގެ އާންމުންނަށެވެ.
އިންސާނީ އެއްވެސް އެހީތެރިކަމެއް ނެތި އެތައް ހަފްތާއެއް ވެފައިވާއިރު، އިސްރާއީލުންވަނީ ޚާއްސަކޮށް ޣައްޒާގެ އުތުރުގައި އދގެ އޭޖެންސީގެ އެއްވެސް ހަރަކާތެއް ހިންގުން މަނާކޮށް ހުއްޓުވާފައެވެ. އަދި އެ އޭޖެންސީގެ ގުދަންތަކަށާއި، ވެހިކަލްތަކަށްވެސް އުދުވާނީ ހަމަލާތައް ދެމުންގެންދެއެވެ.
