ސަރުކާރުގެ ވިސްނުމަކީ ސިޔާސީ ޕާޓީތައް ހަރުދަނާކުރުން: މެމްބަރު މަމްދޫޙު

ސަރުކާރުގެ ވިސްނުމަކީ ސިޔާސީ ޕާޓީތައް ޒިންމާދާރުކުރުވައި، ރަނގަޅު ގޮތެއްގައި ހަރުދަނާކޮށް ކުރިއަށްގެންދިއުންކަމަށް ފުނަދޫ ދާއިރާގެ މެމްބަރު މުހައްމަދު މަމްދޫޙް ވިދާޅުވެއްޖެއެވެ.

މެމްބަރު މިފަދައިން ވިދާޅުވީ ސިޔާސީ ޕާޓީގެ ގާނޫނަށް ސަރުކާރުން ހުށަހަޅާފައިވާ އިސްލާހުގެ ބިލަށް ބަހުސް ކުރައްވަމުންނެވެ.

މެމްބަރު ވިދާޅުވީ މިއަދު ހުށަހެޅި އިސްލާހާއެކީގައި ރައްޔިތުންގެ މެދުގައި ޒަމާންތަކެއްވާދެން ގެއްލިފައިވާ އިތުބާރު އަލުން ހޯދައިދީ، ސިޔާސީ ޕާޓީތަކުން ހިންގާ ސިޔާސީ ހަރަކާތްތައް، ގައުމަށާއި، ރައްޔިތުންނަށް ފައިދާވާނެ މަގަށް ބައްޓަންކުރެވިގެންދާނެ ކަމަށެވެ.

ވޭތުވެދިޔަ އަހަރުތަކުގައި ސިޔާސީ ޕާޓީތަކުން، ސިޔާސީ ކަންކަމުގެ ނަމުގައި ބޮޑެތި ގެއްލުން ދީފައި އެބަހުރިކަމަށް މެމްބަރު ވިދާޅުވިއެވެ.

"އެމްޑީޕީގެ ފުރަތަމަ ވެރިކަން ނިމިގެން ދިޔައިރު، ދިވެހިރާއްޖޭގެ އެތައް މިތަނުގައި ސިޔާސީ ހަރަކާތެއްގެ ނަމުގައި، ސިޔާސީ ޖަޒުބާތެއްގެ ނަމުގައި ހުޅުޖަހާ އަންދާލި ވާހަކަ. އެކަންކަމަށް ޒިންމާވާނެ ބަޔަކު ތިބެންޖެހޭ." މެމްބަރު

މެމްބަރު ވިދާޅުވީ ސިޔާސީ ހަރަކާތްތައް ހިންގަމުންދާއިރު، ގައުމުގެ މަސްލަހަތު ނަގާލައި، ތަފާތު އެކި ދޮގު ވާހަކަތައް ފަތުރައިގެން ސިޔާސީ ހަރަކާތްތައް ހިންގައިގެން ރައްޔިތުންނާއި ސަރުކާރާ ޖެއްސުމަށް މިހާރުވެސް ބަޔަކު މަސައްކަތް ކުރާ ކަމަށެވެ.

މެމްބަރު ވިދާޅުވީ މީގެކުރީ ސަރުކާރުން ކަންތައްތައް މާ ބޮޑަށް ދޫކޮށްލާފައި އޮތުމުން މިހާރު މިއޮތީ އަލުން ސުމަކުން ފަށަންޖެހިފައި ކަމަށެވެ.

މިއަދުގެ ސަރުކާރުން ދަނީ ދިވެހިރާއްޖޭގައ އަޅާނުލެވި ދޫކޮށްލެވިފައި ހުރި އެތައް ކަމެއް އިސްލާހު ކުރުމުގެ މަސައްކަތްތައް ކުރަމުން ކަމަށާއި އެކަންކަން ކުރުމަށް ގާނޫނުން ގެންނަންހޭ އިސްލާހުތައް ގެންނަމުންދާކަމަށް މެމްބަރު ވިދާޅުވިއެވެ.