އޮކްޓޫބަރު 1، 2012 ދުވަހުގެ ރޭ 10:00 އަކުން 11:00 އަށް ޓީވީއެމްގައި ދެއްކި 'އިސްލާމީ ދިރިއުޅުން' ޕްރޮގްރާމްގައި ބައިވެރިވެވަޑައިގަތުމަށްފަހު އެރޭ ދަންވަރު، 2، އޮކްޓޫބަރު 2012 ގެ 12:09 ހާއިރު ދިރިއުޅުއްވަމުން ގެންދެވި އެޕާޓްމަންޓް ހުންނަ ހ. ފުންވިލުގޭ އިމާރާތަށް އަރަން ހުންނަ ސިޑިކައިރީގައި އޭރުގެ ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރުކަމުގައި ހުންނަވަނިކޮށް، މަޝްހޫރު ދީނީ އިލްމުވެރިޔާ ޑރ. އަފްރާޝީމް ޢަލީ ރަހުމް ކުޑަ ގޮތަކަށް އަވަހާރަކޮށްލިތާ މިއަދަށް 12 އަހަރުވީއެވެ. ސުވާލަކީ އެ މަރުގެ ހަގީގަތް ފުލުހުންނަށް ހާމަ ކުރެއްވިއްޖެތޯއެވެ. ފުލުހުންގެ ތަހްގީގުން ޝަރީއަތައް ހާމަ ކޮށްދެވުނު އެއްޗަކީ ކޮބައިތޯއެވެ.
ގިނަ ހެކިންގެ ބަޔާންތަކާއި ޕޮލިސް އިންޓެލިޖަންސްގެ މައުލޫމާތުތައް ހިމަނައިގެން މަރްހޫމް އަފްރާޝީމްގެ މަރާ ގުޅޭ ގޮތުން ކުރި ތަހުގީގުގެ މައްޗަށް އެކުލަވާލާފައިވާ 121 ސަފުހާގެ ތަފްސީލީ ރިޕޯޓެއްވެސް ހާމަކުރިއެވެ. އަފްރާޝީމްގެ މަރަކީ ދީނީ ގޮތުން ހިޔާލު ތަފާތުވާ މީހުންގެ ފަރާތުން އައި ކަމެއް ކަމުގެ އެއްވެސް ހެއްކެއް ނެތް ކަމަށާއި އަފްރާޝީމް މަރާލީ ހަތަރު މިލިޔަން ރުފިޔާ ދީގެން ސިޔާސީ ބޭނުމެއްގައި ކަމަށް އޭރުގެ ޕޮލިސް ކޮމިޝަނަރު ކަމުގެ މަގާމުގައި ހުންނަވައިގެން އަބްދުﷲ ރިޔާޒް ވިދާޅުވެފައިވެއެވެ.
އަފްރާޝީމް އަވަހާރަކޮށްލާފައި ވަނީ އޭނާ އެވަގުތު ހުންނެވި ޕީޕީއެމްގެ ތެރޭގައި އޮތް ސިޔާސީ ވާދަވެރި ކަމެއްގެ ސަބަބުން ޖެހުނު މައްސަލަތަކުގެ ތެރެއިން ކަމަށް ތުހުމަތު ކުރި ބަޔަކު ތިބިއެވެ. އެގޮތުން 2013 ވަނަ އަހަރު އޮތް ރިޔާސީ އިންތިހާބުގައި ޕީޕީއެމްގެ ޓިކެޓު ކުރީގެ ރައީސް އަބްދުﷲ ޔާމީނަށް ދިނުމުގެ ބަދަލުގައި އެ ޓިކެޓް އަފްރާޝީމަށް ދިނުމަށް ރައީސް މައުމޫން ބޭނުންފުޅުވާތީ އަފްރާޝީމް އަވަހާރަކޮށްލި ކަމަށް ބައެއް ފަރާތްތަކުން ތުހުމަތު ކުރިއެވެ. އެހެން ނަމަވެސް އެ ތުހުމަތުތަކަށް ބާރު ލިބޭ އެއްވެސް ހެއްކެއް، އަދި ގަރީނާއެއް ވެސް ލިބިފައެއް ނުވެއެވެ.
އެމަރަށް އިންސާފު ނުލިބި ދިގުލައިގެން ދާތާ އެތައް އަހަރެއް ވެފައިވާއިރު އެމައްސަލައާއި ގުޅިގެން ދައުވާ އުފުލީ ދެ މީހަކާއި ކުޑަ ކުއްޖަކަށެވެ. ދައުވާ އުފުލާފައިވާ މީހުންގެ ތެރެއިން ހ.ލޮބީ ހުސައިން ހުމާމް މަރަން ދަށު ކޯޓުން އިއްވި ހުކުމަށް ހައިކޯޓާއި ސްޕްރީމް ކޯޓުން ވަނީ ތާއީދު ކޮށްފައެވެ. އަފްރާޝީމް އަނިޔާވެރި ގޮތަކަށް އަވަހާރަކޮށްލުމަކީ އެންމެ މީހަކަށް އެކަނި ކުރެވޭނެ ވަރުގެ ކަމެއް ކަމަށް ގިނަ ބައަކު ޤަބޫލުނުކުރި ނަމަވެސް އެ މައްސަލައިގައި ޙުކުމް އިއްވާފައިވަނީ ހަމައެކަނި ހުމާމަށެވެ.
އަފްރާޝީމް އަވަހާރަކޮށްލުމުގައި އަމަލީ ގޮތުން ބައިވެރިވި އެކަކީ ހުމާމް ކަމަށް ވެދާނެއެވެ. ނަމަވެސް އެންމެ ބޮޑު އެއް ސުވާލަކީ ހުމާމް އެކަންކުރި ސަބަބާއިމެދު އުފެދޭ ސުވާލެވެ. އަފްރާޝީމަކީ އެއްވެސް ގޮތަކުން ހުމާމާއި އެއްވެސް ގުޅުމެއް ނެތް ބޭފުޅަކަށްވާއިރު، އެފަދަ އަމަލެއް ކުރަން ހުމާމަށް ޖެހުނު ސަބަބު އަދިވެސް ވަނީ ބޮޑު އޮޅުން ބޮޅުންގަނޑެއްގެ ތެރޭގައެވެ.
އަފްރާޝީމަކީ އޭރު ރައްޔިތުންގެ މަޖިލީހުގައި ހުންނެވި ހަމައެކަނި ދީނީ އިލްމުވެރިޔާއެވެ. ޤާނޫނުލްއުޤޫބާތު ފާސްކުރަން އެއިރު މަޖިލީހުގައި ކުރެވެމުންދިޔަ މަސައްކަތްތަކުގައި މެމްބަރު ގެންދެވީ ވަރަށް ބޮޑެތި މަސައްކަތްތައް ކުރައްވަމުންނެވެ. އިސްލާމް ދީނާއި ތަޢާރުޒްވާ ކަންކަން ޤާނޫނުލްއުޤުބާތުގައި ހިމެނިއަ ނުދިނުމަށާއި އިސްލާމީ ޝަރީޢާ އާއި އެއްގޮތަށް ޤާނޫނުލްއުޤޫބާތުގެ މާއްދާތައް ފާސްކުރެއްވުމަށް ޑރ. އަފްރާޝީމް ޢަލީ ގެންދެވީ ވަރަށް ބޮޑެތި މަސައްކަތްތަކެއް ކުރައްވަމުންނެވެ.
ޢިލްމުވެރިންގެ މެދުގައި ޚިޔާލުތަފާތު މައްސަލަތަކުގައިވެސް ޢިލްމީ ދަލީލުތަކާއެކު އަފްރާޝީމަށް އެ މައްސަލައެއްގައި ފެނިވަޑައިގަންނަވާގޮތް ވިދާޅުވަމުން ގެންދެވިއެވެ. އެހިސާބުން އަފްރާޝީމަށް ވަރަށް ބޮޑު ގޮންޖެހުންތަކެއް ކުރިމަތިވެވަޑައި ގެންނެވިތަން ފެނުނެވެ. އިމާމުވެ ހުކުރު ކުރައްވައިގެން ފައިބާވަޑައިގަންނަވަނިކޮށް، ބަޔަކު ދިމާކޮށް ޖިސްމާނީ އަނިޔާކުރިއެވެ. އަދި އެމަނިކުފާނުގެ އަޤީދާގެ މައްސަލަތައް ހުރިކަމަށް ބުނެ ބަޔަކު ވާހަކަދައްކާ އެކަންތައް މުޖްތަމަޢުގައި ފަތުރަމުންވެސް ގެންދިޔައެވެ. އެހެން އެކަން އޮއްވާ ރައްޔިތުންގެ މަޖިލިހުގެ އުގޫފާރުދާއިރާގެ ގޮނޑި އެމަނިކުފާނު ކާމިޔާބު ކުރެއްވިއެވެ. އެއަށްފަހު އެއީ ދީނީ ޢިލުމުވެރިއެއްގެ އިތުރުން ސިޔާސީ ލީޑަރެއްވެސް މެއެވެ. މިކަމަށް އަލިއަޅުވާލައި ބައެއް ފަރާތްތަކުން ބުނެފައިވަނީ އަފްރާޝީމް އަވަހާރަކޮށްލީ ދީނީ ގޮތުން އުފެދިފައިވާ ހިޔާލު ތަފާތުވުމެއްގެ ތެރޭގައި ދީނީ ހަރުކަށި ބައެއް ކަމަށް ކަމަށެވެ.
ޑޮކްޓަރ އަފްރާޝީމް ޢަލީއަކީ ރީތިކޮށް ޤުރްއާން ކިޔަވައިވިދާޅުވައި، ރީތިކޮށް ޢަރަބި ތާނަ ލިޔުއްވި ބޭފުޅެއްވެސްމެއެވެ. މީހުން އަޑުއަހާހިތްވާގޮތަށް ވާހަކަފުޅު ދައްކަވާ މޮޅު ވާހަކަދެއްކުންތެރިއެކެވެ. ދަރިވަރުންގެ ލޯތްބާއި އިޙްތިރާމް ހޯއްދެވި ހުނަރުވެރި އުސްތާޛެކެވެ. ދީން އުނގަންނައިދެއްވަމުން ގެންދެވީ ދީނުގެ ސަމާޙަތާއި މެދުމިންކަން އިސްކުރައްވައިގެންނެވެ. އެމަނިކުފާނަކީ ކުޅަދާނަ ލިޔުންތެރިއެކެވެ. ހަރުދަނާ ސިޔާސީ މުޙައްނިކެކެވެ. އެމަނިކުފާނާ ޚިޔާލުތަފާތުވާ މީހުންނާވެސް ވަރަށް ގާތް ގުޅުމެއް ބެހެއްޓެވި ބޭފުޅެކެވެ. ވަރަށް ހިތްޕުޅުހެޔޮ މަޖާ މިޒާޖެއްގެ ބޭފުޅެއްވެސްމެއެވެ. ސިޔާސީ ވިސްނުންފުޅު ބިނާކުރެއްވީ، މާތްވެގެންވާ އިސްލާމްދީނުގެ އުޞޫލުތަކާއި، ޑިމޮކްރަސީގެ ހަރުދަނާ އުކުޅުތަކުގެ މައްޗަށެވެ.
ޑޮކްޓަރ އަފްރާޝީމް ޢަލީ، އެމަނިކުފާނުގެ ޙަޔާތްޕުޅުގެ އެންމެފަހު ދުވަސްވެސް ހޭދަކުރެއްވީ ވަރަށް އަވަދިނެތިއެވެ. އެ ދުވަހު ހެނދުނު ކުއްލިއްޔަތުއްދިރާސާތިލް އިސްލާމިއްޔާއަށް ކިޔަވައިދެއްވުމަށް ވަޑައިގެންނެވިއެވެ. އެއަށްފަހު، ރައްޔިތުންގެ މަޖިލީހުގެ އެ ދުވަހުގެ ޖަލްސާގައި ބައިވެރިވެވަޑައިގަތުމަށްފަހު، މެންދުރުފަހު ވީ.ޓީ.ވީ އަށް ވަޑައިގެން ދީނީ ޕްރޮގްރާމެއް ރެކޯޑުކޮށްދެއްވިއެވެ. އެރޭގެ އިރާކޮޅު ކިޔަވައިދެއްވުމަށް ވިލާ ކޮލެޖަށް ވަޑައިގެންނެވިއެވެ. އަދި އޭގެފަހުން އެރޭ ޓީ.ވީ މޯލްޑިވްސް އިން 10:00 އިން 11:00 އަށް ލައިވްކޮށް ކުރިއަށް ގެންދިޔަ 'އިސްލާމީ ދިރިއުޅުން' މި ޕްރޮގްރާމުގައި 'ސާފު ޢަޤީދާއެއްގެ ބޭނުންތެރިކަން' މި މައުޟޫޢަށް ވަރަށް ފުރިހަމައަށް އިންޞާފުކޮށްދެއްވިއެވެ.
ހަމަ ހިތަށް އަރައެވެ. އެ މަރުގެ ހަގީގަތް ފުލުހުންނަށް ހާމަ ކުރެއްވިއްޖެތޯއެވެ. ފުލުހުންގެ ތަހްގީގުން ޝަރީއަތައް ހާމަ ކޮށްދެވުނު އެއްޗަކީ ކޮބައިތޯއެވެ. އަލްމަރްޙޫމް ޑޮކްޓަރ އަފްރާޝީމް ޢަލީއަށް ސުވަރުގޭގެ ދާއިމީ ނިޢުމަތް ދެއްވާށިއެވެ. އާމީން
